Van nahulog sa bangin sa Santa Cruz, 6 sugatan

SANTA CRUZ, Marinduque — Anim katao kabilang ang drayber ang nasugatan matapos mahulog sa bangin ang isang puting van sa Sitio Ilaya II, Brgy. Dolores, Santa Cruz, Marinduque nitong Sabado ng hapon, Marso 28.

Batay sa ulat ng Marinduque Police Provincial Office, naganap ang insidente bandang 2:55 pm habang binabagtas ng sasakyan ang daan patungong Barangay Aturan.

Ang naturang sasakyan ay minamaneho ng isang 43 anyos, na lalaki, residente ng Brgy. Muzon, San Jose del Monte City, Bulacan.

Ayon sa imbestigasyon ng Santa Cruz Municipal Police Station (MPS), nawalan ng kontrol sa manibela ang drayber matapos hindi mapansin ang kurbadang bahagi ng kalsada. Dahil dito, dumiretso ang sasakyan at nahulog sa bangin.

Nagtamo ng minor injuries ang drayber at limang pasahero ng van. Agad silang dinala sa Santa Cruz District Hospital upang mabigyan ng kaukulang lunas.

Samantala, nagpaalala ang awtoridad sa mga bakasyunistang motorista na magdahan-dahan sa pagmamaneho lalo na kung hindi pamilyar sa sitwasyon ng kalsada sa isang lugar. -- Marinduquenews.org

Marinduque PPO naghahanda para sa Stride for the Tide Kalasag Dagat Fun Run 2026

BOAC, Marinduque — Matagumpay na isinagawa ng Marinduque Police Provincial Office (MPPO) ang unang Coordinating Meeting para sa nalalapit na “Stride for the Tide: Kalasag Dagat Fun Run 2026” nitong Biyernes, Marso 27, 9:00 am sa MPPO Conference Room, Camp Colonel Maximo Abad, Boac, Marinduque.

Pinangunahan ni Police Lieutenant Colonel Virgilio R. Madronio, Deputy Provincial Director for Administration/Operations ang pulong na dinaluhan ng mga pangunahing opisyal at tauhan na nakatalaga sa pagpaplano at pagpapatupad ng naturang aktibidad.

Sinimulan ang programa sa pamamagitan ng panalangin na pinangunahan ni Patrolwoman Annabelle A. Aday. Sinundan ito ng roll call ng mga dumalo na isinagawa ni Police Captain Lily G. Nicolas, Chief ng Public Information Office (PIO). Pormal namang binuksan ni Madronio ang pagpupulong.

Samantala, ibinahagi ni Police Major Jerome V. Mendiola, Acting Chief ng Police Community Affairs and Development Unit, ang mga update hinggil sa mga nakatalagang gawain at paghahanda para sa fun run. Tinalakay rin ng Operations Police Non-Commissioned Officer ng Boac Municipal Police Station ang planong deployment at ruta ng fun run upang matiyak ang kaligtasan, kaayusan, at maayos na daloy ng aktibidad.

Nagkaroon din ng open forum kung saan nabigyang-linaw ang mga tungkulin ng bawat yunit, natugunan ang mga katanungan, at higit na napalakas ang koordinasyon sa pagitan ng mga tanggapan. Nagbigay rin si Madronio ng mga karagdagang gabay at direktiba upang matiyak ang matagumpay na pagsasagawa ng programa.

Nagtapos ang pulong sa isang nagkakaisang pangako mula sa lahat ng opisina at yunit, kabilang ang mga virtual attendees mula sa iba't ibang tanggapan at national support unit, na kanilang gagampanan nang maayos ang kani-kanilang tungkulin para sa katagumpayan ng nasabing fun run. -- Marinduquenews.org

Mensahe ni Gov. Melecio Go hinggil sa ika-30 anibersaryo ng Marcopper mining disaster

Una sa lahat, nais kong ipahayag ang aking taos-pusong pasasalamat sa MACEC sa patuloy nitong pagsusulong ng adbokasiya para sa kalikasan at sa pagpapanatiling buhay ng panawagan para sa katarungang pangkalikasan sa ating lalawigan.

Nakikiisa rin ako sa inyo sa pagbibigay-pugay sa mga taong nanindigan sa laban na ito—sa mga pumili ng prinsipyo kaysa pakikipagkompromiso, at ng tapang kaysa pansariling kaginhawahan. Ang kanilang naging halimbawa ay hindi dapat makalimutan. Ngunit mga kasama, hindi sapat ang paggunita lamang.

Tatlong dekada na ang lumipas mula nang mangyari ang trahedya sa Boac River. Sa loob ng panahong iyon, sapat na ang mga salita, sapat na ang mga seremonya, at sapat na rin ang mga tagumpay na nananatili lamang sa papel. Ang mamamayan ng Marinduque ay may karapatan sa higit pa rito. Karapatan nila ang katotohanan.

Kaya naniniwala ako na ito rin ang tamang panahon upang magsalita nang tapat tungkol sa ating kalagayan.

Anumang settlement na may kinalaman sa kinabukasan ng Marinduque ay hindi dapat tingnan lamang sa kung ano ang ipinapangako nito, kundi lalo na sa kung ano ang tunay nitong naisasakatuparan at natitiyak para sa ating lalawigan. Kung may mga kundisyong nagdudulot ng pag-aalinlangan, kung may mga kaayusang maaaring makapinsala o makapagpabigat sa interes ng lalawigan, o kung may mga probisyong legal at pinansyal na nangangailangan pa ng paglilinaw, tungkulin nating harapin ang mga iyon nang direkta, maingat, at may buong pananagutan.

Hindi tayo maaaring maging kampante. Hindi rin natin maaaring ipagtanggol ang mga nagnanais pang higit na makinabang lampas sa makatarungan at nararapat sa kanila.

Hindi natin kayang tanggapin ang kalabuan. At lalong hindi natin maaaring ituring na pangalawa lamang ang kapakanan ng Marinduque.

Sa pagpapatuloy ng ating hakbang, malinaw ang aking paninindigan: susuportahan ko ang bawat legal, makatarungan, at kinakailangang pagsusuri sa lahat ng kasunduang legal at kontraktuwal na may kaugnayan sa usaping ito.

Hinihingi ng interes ng taumbayan na ang lahat ng tuntunin ay malinaw, ang lahat ng obligasyon ay patas, at ang lahat ng pagkilos ay nakatuon sa iisang layunin—ang tunay na rehabilitasyon ng Marinduque at ang katarungang matagal nang hinihintay ng ating mga kababayan.

Kasabay nito, nais ko ring sabihin ito nang may buong paggalang: hindi dapat humantong ang usaping ito sa paninisi lamang sa isang opisina o sa isang tao.

Ang mga pasya, mga pagkukulang, at mga pangyayaring nagdala sa atin sa puntong ito ay kinasangkutan ng iba’t ibang tao at iba’t ibang institusyon. Kung may naging pagkukulang, magkaroon sana tayo ng tapang na aminin iyon. Kung may mga oversight, itama natin ang mga iyon. Ngunit huwag nating baluktutin ang katotohanan sa pamamagitan ng pamimili ng sisisihin sa isang suliraning sama-samang nabuo at sama-samang nakaapekto sa ating lalawigan.

At higit sa lahat, huwag nating haluan ng pulitika ang usaping may kinalaman sa kinabukasan ng Marinduque.

Ang rehabilitasyon ng ating mga ilog, ang pangangalaga sa yaman ng bayan, at ang pagsusulong ng karapatan ng ating mamamayan ay hindi dapat isantabi dahil sa pansariling ambisyon, interes ng grupo, o mga hakbang na ang iniisip lamang ay halalan.

Ang adhikaing ito ay mas malaki kaysa pulitika.

Mas malaki kaysa personalidad.

Mas malaki kaysa alinmang administrasyon.

Bilang inyong Gobernador, isang prinsipyo ang malinaw kong pinanghahawakan: ang kapakanan ng Marinduque ang dapat mauna sa lahat.

Hindi kaginhawahan.

Hindi pulitika.

Hindi pansariling interes.

Marinduque ang dapat mauna.

Kaya naman, magpatuloy tayo nang may kahinahunan, may pagbabantay, at may pagkakaisa. Tiyakin nating ang ipinaglaban sa loob ng napakahabang panahon ay hindi mapapahina dahil sa kakulangan ng kalinawan, kakulangan ng tapang, o kakulangan ng sama-samang disiplina.

Matagal nang naghihintay ang mamamayan ng Marinduque.  Karapat-dapat sila sa katapatan ng ating serbisyo!

Parangalan natin ang nakaraan hindi lamang sa pamamagitan ng pag-alala rito, kundi sa pagpapatunay na tayo ay karapat-dapat sa mga naunang sakripisyo at sa laban na iniwan sa ating pangangalaga.

Maraming salamat po, at nawa’y patuloy na gabayan ng Diyos ang ating mahal na Lalawigan ng Marinduque.

MACEC marks 30 years since Marcopper disaster, calls for action on rehabilitation

BOAC, Marinduque — The Marinduque Council for Environmental Concerns (MACEC) on Tuesday, March 24 commemorated the 30th anniversary of the Marcopper mine tailings disaster with a roundtable discussion (RTD) on the Boac River spill, held at the Sacred Heart Diocesan Pastoral Center.

In a statement, MACEC described the anniversary as “a somber reminder of the 1.6 million cubic meters of toxic waste that devastated the Boac River,” while also highlighting it as “a testament to the decades-long resilience of the Marinduqueño people.”

The group emphasized that the province now stands at a “historic crossroads,” following the Court of Appeals’ approval of a $100-million settlement agreement with Barrick Gold Corporation (formerly Placer Dome).

“We transition from a season of litigation to a season of restoration,” MACEC said, stressing that it is a collective responsibility to ensure the agreement becomes “a catalyst for the physical and ecological healing of our province,” rather than merely a legal victory.

The roundtable discussion aimed to outline concrete steps toward rehabilitation. Among its key objectives were the creation of a unified roadmap to fast-track the implementation of the settlement agreement and initiate science-based environmental restoration, as well as ensuring transparency in the management of funds dedicated to rehabilitating the Boac and Mogpog rivers, Calancan Bay, and other affected areas.

The event also paid tribute to environmental advocates Eliza Hernandez, Mamerto Lanete, and Godofredo Manoy who were recognized for their role in filing the Writ of Kalikasan, a legal action that helped pave the way for the settlement.

During the program, the MACEC secretariat presented the organization’s 30-year struggle for environmental justice, followed by a legal briefing and updates on the settlement. Discussions also tackled the role of a proposed multi-stakeholder oversight council and the challenges ahead in ensuring effective implementation.

Local officials, including members of the Sangguniang Bayan and chief executives from Boac, Mogpog, and Santa Cruz, participated in the discussions. A proposed rehabilitation roadmap was presented by the MACEC chairperson, while the provincial governor through its representative delivered a message emphasizing unity and moving forward.

The event concluded with a synthesis of action points and resolutions, and the signing of a unity statement among stakeholders.

Among those in attendance were Bishop Edwin Panergo of the Diocese of Boac, members of the Sangguniang Panlalawigan, local government officials, non-government organizations, and representatives from the private sector. -- Dr. Randy T. Nobleza/Marinduquenews.org

Halos ₱10-M multa, maaaring magpatigil sa biyahe ng Starhorse na Lucena-Marinduque

MOGPOG, Marinduque -- Nanganganib na masuspinde ang operasyon ng Starhorse Shipping Lines sa rutang Lucena–Marinduque ngayong Semana Santa dahil sa hindi pa nababayarang multa na halos umabot sa ₱10 milyon, ayon sa ulat.

Batay sa impormasyong inilathala ng Abante, nagmula ang naturang halaga sa mga paglabag ng ilang barko ng kumpanya sa mga patakaran ng Philippine Ports Authority (PPA). Kabilang sa mga paglabag ang umano’y hindi tamang pagtatapon ng waste mula sa mga barko mula Pebrero 19, 2025 hanggang Pebrero 11, 2026.

Dahil dito, posibleng hindi na payagang gumamit ng mga pasilidad ng PPA ang Starhorse sa mga pantalan ng Lucena City at Balanacan, Mogpog, Marinduque hangga’t hindi nito nababayaran ang mga obligasyon.

Iniulat din na dalawang beses nang nagpadala ng pormal na abiso ang PPA kay Starhorse Shipping General Manager Merian Reyes, subalit hindi umano ito tinugunan.

Dagdag pa rito, paso na ang accreditation ng kumpanya sa PPA mula pa noong Enero 2025. Ayon sa umiiral na regulasyon, hindi ito maibabalik hangga’t hindi nababayaran ang lahat ng multa at iba pang obligasyon.

Kabilang sa mga barkong pinatawan ng parusa ang Virgen de Peñafrancia II, V, VI, VII, VIII, IX, X, XI, XII, at XV, gayundin ang Viva San Lorenzo Ruiz.

Sa gitna ng inaasahang pagdagsa ng mga pasahero ngayong Semana Santa at sa paggunita ng Moriones Lenten Rites, posibleng magdulot ng abala sa mga biyahero ang naturang isyu, lalo na sa mga planong bumiyahe patungong Marinduque. Patuloy namang hinihintay ang pahayag ng pamunuan ng Starhorse Shipping hinggil sa usapin. -- Marinduquenews.org

Coast Guard nagsagawa ng 'search and rescue exercise' sa Poctoy White Beach

TORRIJOS, Marinduque — Nagsagawa ng 'search and rescue exercise' (SAREX) ang Coast Guard Station (CGS) Marinduque, katuwang ang Substation Santa Cruz, bilang paghahanda sa inaasahang pagdagsa ng mga turista ngayong nalalapit na Mahal na Araw.

Isinagawa ang aktibidad nitong Lunes, Marso 23 sa Poctoy White Beach, isa sa mga pangunahing dinarayo ng mga bisita tuwing Semana Santa. Tampok sa pagsasanay ang simulation ng isang insidente ng pagkalunod upang masubok ang kahandaan ng mga responder sa mga emergency sa baybayin.

Nakibahagi sa nasabing pagsasanay ang iba’t ibang ahensya kabilang ang Municipal Disaster Risk Reduction and Management Office (MDRRMO), Torrijos Municipal Police Station (MPS), PNP Maritime Group, Torrijos Municipal Fire Station, Rural Health Unit (RHU), Municipal Agriculture Office (MAO), at mga opisyal ng Barangay Poctoy.

Layunin ng SAREX na palakasin ang koordinasyon ng mga ahensya at tiyakin ang kahandaan sa mabilis na pagtugon sa mga insidente sa dagat. Sa isinagawang simulation, ipinakita ang water search operations, rescue at retrieval ng biktima, gayundin ang pagbibigay ng basic life support.

Ayon sa Coast Guard Station Marinduque, mahalaga ang ganitong mga pagsasanay upang higit pang mapahusay ang kakayahan ng mga responder at mapanatili ang kaligtasan ng publiko, lalo na sa panahon ng mga okasyon kung kailan dumarami ang mga bumibisita sa mga baybaying-dagat. -- Marinduquenews.org

Magkapatid, huli sa pagbebenta ng ilegal na droga sa Mogpog

MOGPOG, Marinduque — Dalawang magkapatid na lalaki ang naaresto ng pinagsanib na puwersa ng Mogpog Municipal Police Station (MPS) at Police Provincial Drug Enforcement Unit (PPDEU) matapos maaktuhan sa aktong pagbebenta ng ilegal na droga sa Brgy. Market Site, Mogpog, dakong alas-7:30 ng umaga nitong Linggo, Marso 22.

Kinilala ang mga suspek na kapwa residente ng Brgy. Lumbangan, Rosario, Batangas, na umano’y nagnenegosyo ng pagtitinda ng itlog sa pamilihan ng Mogpog. Gayunman, natuklasan ng mga awtoridad na isinasabay nila rito ang pagbebenta ng ipinagbabawal na gamot.

Sa isinagawang buy-bust operation, matagumpay na nakabili ang poseur-buyer ng isang sachet na naglalaman ng hinihinalang ilegal na droga sa halagang P1,000. Matapos ang transaksyon, narekober pa mula sa bulsa ng isa sa mga suspek ang apat pang sachet na nakabalot sa puting papel at nakalagay sa loob ng kaha ng sigarilyo.

Tinatayang may kabuuang timbang na humigit-kumulang isang gramo ang mga nakumpiskang droga na may halagang umaabot sa P4,500.

Kasalukuyang nasa kustodiya ng Mogpog MPS ang dalawang suspek habang inihahanda ang pagsasampa ng kasong paglabag sa Republic Act No. 9165 o ang Comprehensive Dangerous Drugs Act of 2002. — May kasamang ulat mula kay Dennis Nebrejo/PIA-Marinduque

Produksyon ng niyog sa Gasan, mas palalakasin

Aktibong nakiisa sa limang araw na Training on Coconut Production with Good Agricultural Practices ang mga magsasaka mula sa iba’t ibang bahagi ng bayan ng Gasan.

Binigyang-diin ni Philippine Coconut Authority–Marinduque chief Judy DP. Pingco ang kahalagahan ng patuloy na pagpapalakas ng kaalaman at kakayahan ng mga magsasaka upang higit na mapaunlad ang industriya ng niyog sa probinsya.

Bahagi ng pagsasanay ang serye ng talakayan at mga hands-on na aktibidad, kabilang ang wastong pagpili ng de-kalidad na seednuts, paghahanda ng seedbed, at tamang paglalayout at pagtatanim ng niyog. Layunin nitong matiyak na maisasabuhay ng mga kalahok ang mga natutunan at maipatupad ang mga ito sa kanilang mga komunidad. -- Marinduquenews.org

Serbisyo sa Kapitolyo, 5 araw pa rin

BOAC, Marinduque — Maaaring pumili ang mga kwalipikadong empleyado ng pamahalaang panlalawigan ng Marinduque ng apat na araw na compressed workweek, alinman mula Lunes hanggang Huwebes o Martes hanggang Biyernes, bilang bahagi ng hakbang ng gobyerno upang makatipid sa enerhiya habang tinitiyak ang tuluy-tuloy na serbisyo publiko.

Ito ang nakapaloob sa Memorandum Circular No. 16, Series of 2026 na nilagdaan at inanunsyo ni Governor Melecio Go kung saan ay ipatutupad ang pansamantalang apat na araw na workweek simula Lunes, Marso 9.

Layunin ng nasabing work arrangement na matiyak na patuloy na makapagbibigay ng serbisyo ang pamahalaang panlalawigan mula Lunes hanggang Biyernes, upang hindi maantala ang operasyon ng gobyerno.

Batay sa memorandum, kinakailangang pumasok sa opisina mula 7:00 am hanggang 6:00 pm ang mga kwalipikadong empleyado na may 10 oras kada araw, hindi kasama ang isang oras na meal break, upang makumpleto ang 40 oras na trabaho bawat linggo.

Nilinaw naman ni Go na walang tanggapan ng pamahalaang panlalawigan ang magsasara tuwing Biyernes dahil lamang sa pagpapatupad ng compressed workweek.

Magpapatupad ang mga opisina ng angkop na staffing schedules upang matiyak na mananatiling bukas at handang maglingkod ang bawat opisina sa buong regular na linggo ng trabaho.

Alinsunod sa direktiba mula sa Malacañang, hinihikayat ang mga tanggapan ng pamahalaan na magsagawa ng mga hakbang sa pagtitipid ng enerhiya kasunod ng pagtaas ng presyo ng langis sa pandaigdigang merkado dulot ng nagpapatuloy na krisis sa Gitnang Silangan. -- Marinduquenews.org

Maraming empleyado ng Kapitolyo 'di maka-sweldo; kawalan ng prov'l treasurer itinuturong dahilan

BOAC, Marinduque — Patuloy na naghihintay ang maraming empleyado ng pamahalaang panlalawigan Marinduque sa kanilang sahod matapos maantala ang pagproseso ng payroll dahil sa bakanteng posisyon ng Provincial Treasurer.

Ayon kay Governor Melecio Go, nauunawaan niya ang hirap na nararanasan ng mga kawani na umaasa sa kanilang sweldo.

“Alam kong marami sa ating mga kawani ang naghihintay sa kanilang sahod. Naiintindihan ko kung gaano ito kabigat, lalo na para sa mga pamilyang umaasa sa kanilang sweldo,” pahayag ni Go.

Ipinaliwanag ng gobernador na ang pangunahing dahilan ng pagkaantala ay ang kawalan ng provincial treasurer, matapos aniyang umalis sa posisyon ang dating treasurer noong Enero. Aniya, kinakailangan ang pirma ng Provincial Treasurer sa payroll documents upang maiproseso ang sahod ng mga empleyado.

“Kapag walang Treasurer, walang payroll,” ani Go, na idinagdag pang naapektuhan din ang iba pang financial transactions ng pamahalaang panlalawigan.

Bukod dito, lumitaw din umano ang mas malalim na suliranin sa sistema kung saan ay natuklasan noong Pebrero na sa loob ng maraming taon ng mga nakaraang administrasyon ay walang naitalagang Assistant Treasurer o kwalipikadong staff na maaaring pansamantalang pumalit o gumanap sa tungkulin sakaling mabakante ang posisyon ng Provincial Treasurer.

Ipinaliwanag din ni Go na sa ilalim ng Local Government Code, ang Provincial Treasurer ay itinatalaga ng Kalihim ng Department of Finance (DOF), habang ang papel naman ng provincial government ay ang magrekomenda ng mga kwalipikadong kandidato para sa naturang posisyon.

Sa kasalukuyan, nasa Maynila umano ang gobernador upang makipagpulong sa DOF at Regional Development Council (RDC) upang maayos ang sitwasyon at makahanap ng pangmatagalang solusyon.

Humingi rin ng paumanhin si Go sa mga apektadong kawani ng pamahalaang panlalawigan.

“Humihingi po kami ng paumanhin sa ating mga kawani. Ginagawa namin ang lahat upang maayos ito agad at upang hindi na ito maulit pa,” aniya. -- Marinduquenews.org