Kampo ni Velasco, itinanggi ang alegasyon ng dating aid tungkol sa ₱2-B cash delivery kay VP Sara

BOAC, Marinduque -- Itinanggi ng kampo ni dating House Speaker at Marinduque representative Atty. Lord Allan Jay Velasco ang alegasyon na siya at ang kanyang asawa ay sangkot sa umano’y paghahatid ng mahigit ₱2 bilyong cash kay Vice President Sara Duterte.

Ayon kay Atty. Rowell D. Ilagan, tagapagsalita ni Velasco, walang batayan ang mga alegasyon laban sa dating speaker at sa kanyang asawa. Hinimok din niya ang publiko na maging maingat sa pagtanggap sa ulat habang sinusuri ng kanilang kampo ang pananagutan ng mga sangkot.

“The former Speaker of the House's record of service in the government is untainted with corruption and his wife's benevolence is widely known, leaving no basis for the illegal allegations now being suggested,” wika ni Ilagan.

Nag-ugat ang alegasyon sa pahayag ni dismissed Police Corporal Rodulfo “Rudy” Gracioso Jr., na nagsabing nagsilbi siyang head of security ni Velasco mula 2018 hanggang 2022. Ayon kay Gracioso, mahigit 20 beses umano siyang naghatid ng mga maletang may cash kay Duterte sa Metro Manila, Davao at iba pang lugar na may halagang ₱20 milyon hanggang ₱50 milyon bawat transaksyon.

Inihayag din ni Gracioso na naghatid s'ya ng cash kay dating presidente Rodrigo Duterte at Davao City representative Paolo Duterte.

Iniimbestigahan na ng National Bureau of Investigation (NBI) ang kanyang mga pahayag.

Samantala, itinanggi rin ni Vice President Sara Duterte na kilala niya si Gracioso o na nakatanggap siya ng pera mula rito. Sinabi niyang hinihintay ng kanyang mga abogado ang opisyal na kopya ng affidavit mula sa NBI bago sila magsagawa ng legal na hakbang. -- Marinduquenews.org

$100-M settlement agreement sa pagitan ng Barrick at PGM, nalalapit na ang deadline

BOAC, Marinduque — Tinatayang nasa 14 na araw na lamang ang nalalabi bago ang itinakdang deadline upang kompletuhin ng pamahalaang panlalawigan ang mga kinakailangang dokumento para sa tuluyang pagkamit ng $100-million settlement fund sa ilalim ng kasunduan sa pagitan ng Barrick Gold Corporation at Provincial Government of Marinduque (PGM).

Ayon kay environmental advocate at dating bise gobernador Adeline Angeles, mahalaga ang naturang pondo dahil nakatakda itong gamitin para sa rehabilitasyon ng mga lugar na naapektuhan ng pagmimina, kabilang ang mga lugar na patuloy na inaalala dahil sa kondisyon ng Maguila-guila Dam.

BASAHIN: $50M pondo para sa rehab ng Marcopper disaster, naideposito na sa escrow account 

Ani Angeles, kinakailangang maumpisahan na sa lalong madaling panahon ang rehabilitasyon upang maiwasan ang mga posibleng panganib sa mga komunidad, lalo na ang banta ng biglaang pagbaha o iba pang sakuna na maaaring idulot ng hindi maayos na kalagayan ng mga mining-affected areas.

Binigyang-diin din ng dating gobernador ang pangangailangan ng mas agresibong pagtutok ng Department of Environment and Natural Resources (DENR) at ng pamahalaang panlalawigan sa pangunguna nina Gov. Melecio Go at Bise Gobernador Romulo Bacorro, Jr upang matiyak ang maayos na pagpapatupad ng mga nakasaad sa settlement agreement.

BASAHIN: Tagas ng basurang mina mula sa San Antonio Pit, patuloy na sumisira sa ilog ng Mogpog

Nanawagan din siya ng panalangin upang mawala ang mga natitirang balakid sa proseso at tuluyang maisakatuparan ang kasunduan para sa kapakinabangan ng probinsya.

Ang inaasahang $100-million settlement fund ay nakikitang mahalagang mapagkukunan ng pondo para sa mga kinakailangang hakbang sa rehabilitasyon ng mga lugar na naapektuhan ng pagmimina sa Marinduque, lalo na sa mga lugar na nangangailangan ng agarang atensyon para sa kaligtasan ng mga residente at proteksyon ng kapaligiran.

Matatandaang hiniling ng kampo ni Go sa Court of Appeals na bawasan ang 25 porsiyentong contingency fee ng Salazar Enrile Defensor & De Mata Law Offices (SedaLaw) kaugnay ng settlement agreement.

BASAHIN: Kampo ni Go, ligwak sa SedaLaw; 25% contingency fee, makatwiran ayon sa CA 

Gayunman, ibinasura ng Court of Appeals ang naturang kahilingan at sa halip ay idineklarang makatwiran, balido at may bisa ang napagkasunduang 25 porsiyentong contingency fee ng law firm. -- Marinduquenews.org

Tagas ng basurang mina mula sa San Antonio Pit, patuloy na sumisira sa ilog ng Mogpog

MOGPOG, Marinduque — Patuloy na lumalala ang epekto ng basurang mina mula sa San Antonio Pit na dumadaloy sa ilog ng Mogpog, batay sa isinagawang pagsusuri ng Task Force San Antonio nitong Huwebes, Setyembre 10.

Tiningnan ng task force ang kalagayan ng naturang ilog mula Barangay Bocboc hanggang sa creek na nagmumula sa Paadjao Falls. Kasama sa pagsusuri ang Marinduque Council for Environmental Concerns (Macec) at iba pang ahensya ng pamahalaan.

Batay sa kanilang obserbasyon, lumalala pa ang epekto ng waste dump sa paligid ng San Antonio Pit, na pinanggagalingan ng basurang mina na dumadaloy at naiipon sa kahabaan ng ilog ng Mogpog.

Ayon kay Macec executive secretary Elizabeth Manggol, kapansin-pansin ang pagbabago sa kulay ng tubig habang tinatahak ang ilog patungo sa lugar ng San Antonio Pit.

“Kulay orange naman ang aming nakita pagkatapos ng kulay berde at patingkad nang patingkad ang kulay kalawang na ito hanggang sa defective na Maguila-guila Siltation Dam, hanggang sa paanan ng San Antonio Pit,” pahayag ni Manggol.

Dagdag niya, mataas din ang acidity ng tubig batay sa isinagawang testing ng Municipal Environment and Natural Resources Office (MENRO) ng Mogpog.

Makikita rin sa mga larawang ibinahagi ng Macec ang tinatawag na acid mine drainage (AMD)—tubig na lubhang acidic at maaaring may dalang toxic heavy metals na nabubuo kapag ang mga mineral na may sulfur, gaya ng pyrite, ay nalalantad sa hangin at tubig dahil sa pagmimina.

Ang naturang acid mine drainage ay patuloy nang dumadaloy sa ilog mula pa noong dekada 1990, nang magsimula itong mapunta sa naturang daluyan ng tubig.

Samantala, nakatakdang magtapos ngayong Setyembre ang deadline para kompletuhin ng pamahalaang panlalawigan ng Marinduque ang mga kinakailangang dokumento para sa nakatakdang $100 milyon na pondong inilaan ng Barrick Gold Corporation, alinsunod sa kasunduang nilagdaan noong 2025.

Inaasahang gagamitin ang pondo para sa rehabilitasyon ng mga lugar na naapektuhan ng pagmimina, kabilang ang mga lugar na may kaugnayan sa Maguila-guila Dam na patuloy na binabantayan dahil sa kalagayan nito.

Ang Task Force San Antonio, na inorganisa sa pamumuno ni Mogpog Mayor Senen Livelo, ay nakatuon sa patuloy na monitoring sa kalagayan ng ilog ng Mogpog at sa pagtukoy ng mga konkretong hakbang upang matugunan ang mga epekto ng basurang mina sa nasabing lugar. -- Larawan mula sa Macec/Marinduquenews.org

P3.5-M halaga ng petrolyo, nasabat sa Gasan; 2 arestado

GASAN, Marinduque — Nasabat ng mga awtoridad ang tinatayang nasa ₱3.54 milyon halaga ng petroleum products at transport equipment sa isinagawang joint police operation sa Brgy. Bachao Ibaba, Gasan, Marinduque nitong Martes, Setyembre 8.

Arestado sa operasyon ang dalawang suspek matapos umanong mahuling nagdi-dispense ng petroleum products gamit ang isang tanker nang walang kinakailangang authority at permit mula sa Department of Energy (DOE), ayon sa Criminal Investigation and Detection Group (CIDG) at Mimaropa police.

Tinatayang 19,800 litro ng petroleum products ang nakumpiska, kabilang ang 12,000 litro ng premium gasoline, 6,000 litro ng diesel at 1,800 litro ng unleaded gasoline na nagkakahalaga ng humigit-kumulang ₱1.734 milyon.

Kasama rin sa nasabat ang isang blue-and-white na 10-wheeler tank lorry na nagkakahalaga ng tinatayang ₱1.805 milyon, gayundin ang suction hose, official receipt at certificate of registration ng sasakyan, at delivery receipt.

Umabot sa ₱3.538 milyon ang kabuuang tinatayang halaga ng mga nakumpiska sa operasyon.

Nahaharap ang dalawang suspek sa kasong paglabag sa Section 2(a), kaugnay ng Section 3(h), ng Batas Pambansa Blg. 33, na inamyendahan ng Presidential Decree No. 1865, na nagpaparusa sa mga ilegal na gawain kaugnay ng petroleum products. -- Mariduquenews.org

2 kabataan mula Marinduque, pasok sa Top 10 ng librarian licensure exam

TORRIJOS, Marinduque -- Dalawang kabataang Marinduqueña ang nagningning sa Librarian Licensure Examination (LLE) 2026 matapos makapasok sa Top 10 ng pagsusulit.

Nanguna sa buong pagsusulit si Natalie Ericca Malubag ng Mogpog, na nakakuha ng 92.65% rating para sa Rank 1.

Samantala, si Jemima Faith Peralta ng Torrijos, na nagtala ng 91.70% ay nagkamit ng Rank 5.

Si Malubag ay nagtapos sa Unibersidad ng Santo Tomas habang si Peralta ay sa Philippine Normal University-Manila.

Pareho silang magna cum laude ng kani-kanilang batch na kumuha ng kursong Bachelor of Library and Information Sciences.

Ang kanilang tagumpay ay dagdag na karangalan para sa Marinduque at patunay sa husay at dedikasyon ng mga Marinduqueño sa larangan ng edukasyon. -- Marinduquenews.org

Ka Rosie, unang babaeng bise-gobernador ng Marinduque, pumanaw sa edad na 96

SANTA CRUZ, Marinduque — Pumanaw na ang unang babaeng nagsilbi bilang bise-gobernador ng lalawigan ng Marinduque na si Rosa E. Lecaroz, mas kilala bilang “Ka Rosie.”

Ayon sa kaanak niyang si Leonee Bunsoy Sto. Tomas, binawian ng buhay si Lecaroz nitong Huwebes, Setyembre 3, matapos makaranas ng mild stroke.

Nitong Agosto 30 lamang ay ipinagdiwang ni Lecaroz ang kanyang ika-96 na kaarawan.

Nagsilbi si Lecaroz bilang bise-gobernador ng Marinduque mula 1992 hanggang 1995. Makalipas ang ilang taon, nahalal naman siya bilang alkalde ng bayan ng Santa Cruz at nagsilbi mula 1998 hanggang 2001, kung saan kinilala siya bilang "centennial mayor.”

Nakaburol ang mga labi ng namayapang lingkod bayan sa Regalia St., Brgy. Maharlika, Santa Cruz habang nakatakda naman ang kanyang libing sa Setyembre 9.

Nagpaabot ng pakikiramay si Santa Cruz Mayor Marisa Red-Martinez sa naulilang pamilya.

“Nawa’y magsilbing alaala at inspirasyon ang kanyang buhay sa lahat ng mga taong nakasama at napamahal sa kanya. Sa panahong ito ng pagdadalamhati, dalangin ko po ang inyong lakas, kapanatagan, at pagdamay sa isa’t isa,” pahayag ni Red-Martinez.

Sa kanyang pagpanaw, iniwan ni Ka Rosie ang isang mahalagang bahagi ng kasaysayan ng lokal na pamahalaan sa Marinduque bilang unang babaeng humawak ng posisyon ng bise-gobernador sa lalawigan. -- Marinduquenews.org

Goodchow, 27 nang naghahatid ng masasarap na pagkain sa mga Marinduqueño

BOAC, Marinduque -- Sa pag-usbong ng industriya ng fast food sa Marinduque, nananatiling matatag ang isang lokal at paboritong kainan ng mga Marinduqueño — ang Goodchow Food Express, na 27 taon nang naghahatid ng masasarap at lutong-lokal na pagkain sa puso ng Boac.

Sa loob ng halos tatlong dekada, hindi lamang pagkain ang naihahain ng Goodchow. Kasama sa bawat serving ang mga kuwentong nabuo sa hapag-kainan—mula sa simpleng pagsasalo ng pamilya hanggang sa mga espesyal na pagdiriwang at alaala ng mga taga-isla.

Lubos ang pasasalamat ng Goodchow sa patuloy na pagtitiwala at pagmamahal ng kanilang mga suki. Para sa kanila, ang bawat balik, bawat order, at bawat ngiting natatanggap mula sa kanilang mga kababayan ay bahagi ng kuwentong patuloy nilang binubuo.

Sa kabila ng mga pagbabagong dala ng panahon at pagdami ng pagpipilian, nananatili ang kanilang pangako — ang patuloy na ibigay ang makakaya para sa mga Marinduqueño at kanilang mga bisita.

27 taon ng paglilingkod. 27 taon ng tiwala. At isang kuwentong patuloy pang isinusulat.

Proudly Boac. Proudly Marinduque. At higit sa lahat, Goodchow - 27 taon nang kasama sa bawat salu-salo at alaala. -- Marinduquenews.org

Mula binhi hanggang ani: Hazel Joy, unti-unting binubuo ang mas matatag na kinabukasan

BUENAVISTA, Marinduque — Sa bawat butil ng binhing itinanim, may kasamang pag-asa. Sa bawat punlang inalagaan, may pangarap na unti-unting lumalaki.

Para kay Hazel Joy Sarmiento, 25 anyos, isang ina mula sa Buenavista, Marinduque, ang simpleng pagtatanim ng amargoso (lokal na tawag sa ampalaya) ay naging higit pa sa isang maliit na kabuhayan. Naging daan ito upang madagdagan ang kita ng kanilang pamilya at magkaroon siya ng mas matatag na sandigan para sa kinabukasan.

Sa tulong ng Sustainable Livelihood Program (SLP) ng Department of Social Welfare and Development Field Office-Mimaropa, nabigyan si Hazel Joy ng pagkakataong magsimula ng sariling ampalaya production project.

Bago ito, tulad ng maraming ina, pangunahing hangarin niya ang matugunan ang pang-araw-araw na pangangailangan ng kanilang tahanan. Ngunit batid niyang kailangan niya ng mas maaasahang pagkakakitaan upang makatulong sa gastusin ng pamilya.

Mula sa tulong na natanggap, nagsimula siyang magtanim at mag-alaga ng ampalaya—isang maliit na proyekto na kalaunan ay nagbigay ng malaking pagbabago sa kanilang pamilya.

SA LIKOD NG BAWAT ANI, MAY PAGSUBOK

Hindi naging madali ang pagsisimula.

Sinubok ni Hazel Joy ang pabago-bagong panahon at ang pangangailangang masusing alagaan ang mga pananim. Kailangang bantayan ang mga halaman, tiyaking maayos ang kanilang kondisyon at harapin ang mga hamon na maaaring makaapekto sa ani.

Ngunit sa halip na sumuko, pinili niyang magpatuloy.

Malaking bahagi rin ng kanyang paglalakbay ang suporta ng kanyang pamilya, lalo na ng kanyang ina, na tumulong sa pag-aalaga ng mga pananim.

Sa bawat araw na lumilipas, natutunan ni Hazel Joy na ang isang matagumpay na kabuhayan ay hindi lamang nakasalalay sa puhunan. Kailangan din nito ng tiyaga, tamang pag-aalaga, at kahandaang matuto mula sa bawat karanasan.

MULA SA PUNLA, TUNGO SA PAG-ASA

Dumating ang panahon na nagsimulang mamunga ang mga ampalaya.

Regular na ang kanyang mga ani at naibebenta niya ang mga ito sa kanilang komunidad. Bagama’t maliit sa simula, nakatulong ang kinikita niya upang madagdagan ang pambayad sa pagkain, edukasyon, at iba pang pangunahing pangangailangan ng kanilang pamilya.

Kasabay ng pagdami ng ani ay ang paglago rin ng kanyang kumpiyansa.

Sa aktuwal na karanasan sa pagtatanim, pag-aani at pagbebenta, unti-unti niyang natutunan kung paano pangasiwaan ang kanyang puhunan, produkto at kita.

Ang dating maliit na proyekto ay naging pagkakataon upang matuto, kumita at mas mapalapit sa layunin niyang magkaroon ng mas matatag na kabuhayan.

ISANG PAGKAKATAONG MAGING SARILING SANDIGAN

Para kay Hazel Joy, higit pa sa puhunan ang natanggap niyang tulong.

Ito ay pagkakataong magsimula.

“I am deeply grateful to President Ferdinand Marcos Jr. and to everyone who has been part of the Sustainable Livelihood Program. The assistance we received was not only capital for our livelihood but also gave us greater hope for our family’s future.”

Ayon kay Hazel Joy, bilang isang ordinaryong mamamayan, malaking bagay ang mabigyan ng pagkakataong matuto, magsimula ng sariling kabuhayan at unti-unting maiangat ang buhay sa pamamagitan ng sariling pagsisikap.

Bawat ani at bawat karagdagang kita, aniya, ay nagsisilbing patunay na ang tulong ay maaaring magbunga ng maganda kapag sinabayan ng sipag at tiyaga.

MALIIT NA SIMULA, MAS MALAKING PANGARAP

Ang kuwento ni Hazel Joy ay larawan ng kung paano maaaring maging daan ang isang simpleng livelihood project tungo sa higit na pagiging self-reliant ng isang pamilya.

Sa pamamagitan ng SLP, patuloy na nagbibigay ang DSWD Field Office MIMAROPA ng livelihood assistance at capacity-building support sa mga indibidwal at organisadong grupo upang magkaroon sila ng pagkakataong mapalakas ang kita, mapaunlad ang kanilang kakayahan at makabuo ng mas matatag na kabuhayan.

Para kay Hazel Joy, hindi lamang ampalaya ang kanyang inaani.

Sa bawat bunga na kanyang napipitas, naroon ang bunga ng kanyang tiyaga. Sa bawat kinikita, naroon ang dagdag na ginhawa para sa kanyang pamilya. At sa bawat bagong tanim, may panibagong pag-asang maihahanda niya ang kanilang pamilya para sa mas magandang bukas.

Mula sa isang maliit na binhi, unti-unting lumalago ang isang mas malaking pangarap—isang kinabukasang itinatanim sa sipag, inaalagaan sa tiyaga, at inaani sa pag-asa. -- May kasamang ulat mula sa DSWD Mimaropa/Marinduquenews.org

Marinduque, masiglang nakilahok sa RSTW 2026

TORRIJOS, Marinduque — Masiglang nakiisa ang lalawigan ng Marinduque sa pagbubukas ng 2026 Regional Science, Technology, and Innovation Week (RSTW) na isinagawa nitong Lunes, Agosto 17, sa Torrijos Stadium.

Sa unang pagkakataon, sabay-sabay na isinagawa ang pagdiriwang sa limang lalawigan ng Mimaropa habang nagsilbing host at sentrong lugar ng mga pangunahing aktibidad ang lalawigan ng Romblon.

Sinimulan ang programa sa pamamagitan ng live feed mula sa itinuturing na marble capital ng bansa, kung saan binigyang-diin ni DOST Secretary Renato Solidum Jr. ang layunin ng ahensya na maging mas madaling maunawaan at mas malapit sa mga mamamayan.

Ayon kay Solidum, nakatuon ang DOST sa pagbibigay ng mga solusyon at pagbubukas ng mga oportunidad para sa lahat, alinsunod sa tagline nitong “One DOST for You: Solutions and Opportunities for All.”

Sa Marinduque, isinagawa ang ceremonial na pagpuputong sa mga panauhin bilang simbolo ng mainit na pagtanggap ng lalawigan sa mga kalahok at bisita.

Kabilang sa mga unang aktibidad ang Forum on FISH-I Technology, na nakatuon sa mga makabagong pamamaraan para sa marine aquaculture monitoring at resource assessment.

Isinagawa rin ang ceremonial turnover ng mga galon na ipinagkaloob ng pamahalaang panlalawigan na pinangunahan ni Provincial Disaster Risk Reduction and Management Office Head Juan Fernandez Jr. at tinanggap naman ng punong barangay ng Maniwaya na si Ana Liza Romasanta.

Ayon kay Romasanta, labis-labi ang kanyang pasasalamat sa DOST para sa mga proyektong ipinagkaloob sa kanilang isla, partikular ang water desalination system na pinondohan ng ahensya at kasalukuyang napakikinabangan ng mga residente.

“Ang isla ng Maniwaya ay masasabi kong talagang napaka-super blessed kaya pasasalamat ang ipinapaabot ko sa inyo,” ani Romasanta

Samantala, dinagsa rin ng mga mag-aaral at kalahok ang mga exhibit na tampok ang iba't ibang teknolohiya na nagpapakita ng mga makabagong sensya at innovation. May mga lokal na produkto ring itinampok at ibinenta ng Marinduque State University at Pamahalaang Bayan ng Torrijos.

Tampok din sa programa ang Itik Pinas Technology Forum, na nakatuon sa pagpapataas ng productivity, profitability at sustainability ng pag-aalaga ng itik. Pinangunahan ito ni Dr. Synan Baguio, direktor ng Livestock Research Division ng DOST-Philippine Council for Agriculture, Aquatic and Natural Resources Research and Development (PCAARRD).

Ipinakita rin sa exhibit ang programa para sa Marine Habitat Restoration through Reef Block Deployment and Coral Planting, isa sa mga patuloy na isinusulong na inisyatiba ng DOST sa Marinduque para sa pangangalaga at pagpapanumbalik ng yamang-dagat.

Ang RSTW ay regional counterpart ng National Science and Technology Week (NSTW) at nagsisilbing platform upang maipakita ang mga programa, serbisyo at adbokasiya ng ahensya, gayundin ang kahalagahan ng agham, teknolohiya at innovation sa lokal na pag-unlad.

Bitbit ng pagdiriwang ang temang “Siyensya, Teknolohiya, at Inobasyon: Kabalikat sa Matatag, Maginhawa, at Panatag na Kinabukasan,” at regional sub-theme na “Science, Technology, and Digital Innovation: Driving Food Security, Sustainable Energy, and National Resilience.”

Nakasentro rin ang pagdiriwang sa regional theme na “Sustain Mimaropa: Biodiversity, Environmental Sustainability, and Natural Resources,” na nagbibigay-diin sa mga science-based solution.

Kabilang pa sa mga nakatakdang aktibidad sa ikalawang araw ay ang Regional Scientific Conference at Forum on Solar-Powered Technologies for Sustainable Development, habang magtatapos ang pagdiriwang sa pagpapakita ng mga videos at paggagawad sa mga mananalong kalahok.

Ipinakikita ng RSTW na ang agham ay hindi lamang pinag-aaralan kundi ginagamit at isinasabuhay bilang katuwang sa pangangalaga ng kalikasan at likas na yaman. -- Marinduquenews.org

Bagong hepe ng BJMP Mimaropa, ininspeksyon ang mga kulungan sa Marinduque

BOAC, Marinduque -- Nagsagawa ng inspeksyon sa mga pasilidad ng Bureau of Jail Management and Penology (BJMP) sa Marinduque si bagong talagang BJMP Mimaropa regional Director Deogracias Fanio De Castillo, kamakailan.

Layunin ng inspeksyon na masuri ang kalagayan at operasyon ng mga pasilidad, gayundin ang pagpapatupad ng mga programa at polisiya ng BJMP sa mga district jail sa lalawigan.

Sa pakikipag-ugnayan sa mga tauhan, binigyang-diin ni Jail Senior Superintendent De Castillo ang kahalagahan ng disiplina, propesyonalismo, integridad, pagtutulungan at dedikasyon sa tungkulin bilang mahahalagang bahagi ng epektibong paglilingkod sa publiko.

Nagbigay rin si del Castillo ng gabay at paghikayat sa mga jail personnel, partikular sa kanilang mahalagang papel sa pagpapanatili ng kaligtasan at seguridad ng mga pasilidad, gayundin sa pangangalaga, kustodiya at rehabilitasyon ng mga persons deprived of liberty (PDL).

Naging pagkakataon din ang pagbisita upang mapakinggan ng regional leadership ang mga concerns at operational needs ng bawat jail unit at mapalakas ang komunikasyon at koordinasyon sa pagitan ng Regional Office at mga field unit.

Binigyang-diin naman ng pamunuan ng BJMP sa rehiyon ang patuloy nitong commitment na palakasin ang jail management, pangalagaan ang kapakanan at morale ng mga personnel, at tiyakin ang ligtas, maayos, secure at makataong serbisyo sa mga PDL. -- Marinduquenews.org